၂၀၁၁ခုနှစ် အောက်တိုဘာလ ၂၁ ရက်။
FTUB
ထိုင်းနိုင်ငံမြောက်ပိုင်းမှ စီးဆင်းလာသော ရေထုကြောင့် ၂၀၁၁ခုနှစ် အောက်တိုဘာလ လဆန်းပိုင်းမှ စတင်၍ ထိုင်းနိုင်ငံအတွင်းရှိ ခရိုင်ပေါင်း ၃၀ ကျော်တွင် ရေကြီးနေသည်ဟု သိရှိရပါသည်။ အဆိုးဆုံးဒေသများမှာ အယုဒ္ဓယ၊ ပထုံဌာနီ၊ နခွမ်းစ၀မ် ဒေသများဖြစ်ပြီး ထိုဒေသတွင် အလုပ်လုပ်ကိုင်နေသာ မြန်မာရွှေ့ပြောင်း အလုပ်သမား ၃၀၀၀၀ ကျော် ရေဘေးဒုက္ခနှင့် ရင်ဆိုင်နေရပါသည်။ ထို့ကြောင့် ရေဘေးဒုက္ခနှင့်ရင်ဆိုင်နေရသော မြန်မာရွှေ့ပြောင်းအလုပ်သမားများကို ကူညီပေးရန်အတွက် မြန်မာနိုင်ငံအလုပ်သမားသမဂ္ဂများအဖွဲ့ချုပ် (FTUB) မှ အရေးပေါ်ကယ်ဆယ်ရေးကော်မတီ တရပ်ကို ၂၀၁၁ခုနှစ်၊ အောက်တိုဘာလ ၁၉ ရက်နေ့တွင် ဖွဲ့စည်းလိုက်ပါသည်။
ရွှေ့ပြောင်းအလုပ်သမားများ၏ ယာယီနိုင်ငံကူးလက်မှတ်နှင့် အလုပ်သမားကဒ်များ အစရှိသော စာရွက်စာတမ်းများကို များသောအားဖြင့် အလုပ်ရှင်များမှ သိမ်းဆည်းပေးထားတတ်ပါသည်။ ယခု ရေကြီးသောအခါ အလုပ်သမားများ၏ အထောက်အထားစာရွက်စာတမ်းများ အစုလိုက် အပြုံလိုက် ပျောက်ဆုံးခြင်း၊ ပျက်စီးခြင်းများ ရှိနေပါသည်။ အချို့စာရွက်စာတမ်းကိုင်ဆောင်ထားသူများအနေဖြင့် သက်တမ်းကုန်ဆုံးခြင်း သတင်းပို့ရမည့် ရက်ကျော်လွန်ခြင်း တို့အပေါ် စိုးရိမ်သောကရောက်သူများလည်း ရှိပါသည်။
ထိုသို့ စာရွက်စာတမ်းများ၊ ရက်လွန်သော အလုပ်သမားများအနေဖြင့် ထိုင်းရေဘေးကယ်ဆယ်ရေးစခန်းများသို့ သွားရောက်နိုင်ခြင်းမရှိဘဲ ဖြစ်နေပါသည်။
အချို့အလုပ်သမားများမှာ အလုပ်ရှင်မှ စာရွက်စာတမ်းများကို သိမ်းဆည်းထားသဖြင့် ၄င်းတို့၏ စာရွက်စာတမ်းများဆုံးရှုံးမည်ကို စိုးရိမ်သောကြောင့် ရေဘေးလွတ်ရာသို့ နေရာရွှေ့ပြောင်းရမည်ကိုပင် စိုးရိမ်လျှက်ရှိနေပါသည်။
ရွှေ့ပြောင်းအလုပ်သမားများ၏ ယာယီနိုင်ငံကူးလက်မှတ်များသည် ထိုင်းလူဝင်မှုကြီးကြပ်ရေးသို့ (၃) လတကြိမ် အကြောင်းကြားရပါသည်။ ရေကြီးနေသည့်အတွက် အလုပ်သမားများ မသွားမလာနိုင်ဘဲ အကြောင်းမကြားနိုင်ဖြစ်နေသည့်အတွက် ထောက်ခံချက်လုပ်ပေးရန်လိုပါသည်။
ဤကိစ္စများကို ဖြေရှင်းပေးရန်အတွက် သက်ဆိုင်ရာ အာဏာပိုင်များထံ ကြိုတင်အကြောင်းကြားထားခြင်းကို FTUB အရေးပေါ်ကယ်ဆယ်ရေးကော်မတီမှ ဆောင်ရွက်ပေးနေပါသည်။ သက်ဆိုင်ရာ အာဏာပိုင်မှလည်း ရေဘေးဒုက္ခသည်များ၏ အထောက်အထားစာရွက်စာတမ်းများကိစ္စအား မှတ်ပုံတင်ထားသည့် နယ်မြေအလိုက် ယာယီအထောက်အထား စာရွက်စာတမ်းများ ထုတ်ပေးမည်ဖြစ်ကြောင်း အကြောင်းပြန်လာပါသည်။
ထို့အပြင် သက်ဆိုင်ရာ အာဏာပိုင်များ မြန်မာရွှေ့ပြောင်းအလုပ်သမားများနှင့် ပူးပေါင်းဆောင်ရွက်ပြီး ရေဘေးကြောင့် ဒုက္ခရောက်နေသည့် အလုပ်သမားများအား စားစရာ၊ အ၀တ်အစားများနှင့် ထိုင်းရေဘေးကယ်ဆယ်ရေး စခန်းများနှင့် ဆယ်သွယ်ပေးခြင်းတို့ကိုလည်း ကူညီဆောင်ရွက်ပေးနေပါသည်။
ရေဘေးကြောင့် အရေးပေါ်ရွှေ့ပြောင်းရ၍ ကွဲကွာနေသော မိသားစုများအား ပြန်လည်စုစည်းနိုင်ရေး အတွက်လည်း ဆက်သွယ်ဆောင်ရွက်ပေးလျှက်ရှိပါသည်။
အရေးပေါ်ကယ်ဆယ်ရေးကော်မတီသို့ ဆက်သွယ်ရမည့် ဖုန်းနံပါတ်များမှာ 0811036375 ၊ 0811036417 ဖြစ်ပါသည်။
မြန်မာနိုင်ငံ အလုပ်သမားသမဂ္ဂများအဖွဲ့ချုပ် Federation of Trade Unions Myanmar (FTUM)သည် မြန်မာပြည်သူ တရပ်လုံးအတွက် ဒီမိုကရေစီရေး၊ လူ့အခွင့်ရေး၊ လူမှု တရား မျှတရေးနှင့် အလုပ်သမား သမဂ္ဂများ မြန်မာပြည်တွင် ပြန်လည်ပေါ်ထွန်းလာရေးအတွက် (FTUM) ကို စတင် ဖွဲ့စည်းခဲ့သည့် အချိန်မှစ၍ ယနေ့တိုင် အစဉ်တစိုက် ကြိုးပမ်း လုပ်ဆောင်နေသည့် အဖွဲ့အစည်း ဖြစ်သည်။
No comments:
Post a Comment